दैलेखको गुराँस गाउँपालिकाका तत्कालीन प्रमुख प्रशासकीय अधिकृत दीपककुमार आचार्य र निर्माण व्यवसायी सुवास कार्कीविरुद्ध भ्रष्टाचार मुद्दा दायर भएको छ।
अख्तियार दुरुपयोग अनुसन्धान आयोगले सोमबार विशेष अदालत काठमाडौंमा आरोपपत्र दायर गरेको हो।
आयोगका प्रवक्ता सुरेश न्यौपाने गाउँपालिका अन्तर्गतको कर्णाली नदी र लोहरेखोला क्षेत्रबाट ढुङ्गा, बालुवा तथा गिट्टी उत्खननको ठेक्कामा २२ लाख ४४ हजार ५०० रुपैयाँ राजस्व हिनामिना गरेको आरोपमा उनीहरूविरुद्ध मुद्दा दायर भएको बताए।
अनका अनुसार आर्थिक वर्ष २०७८/७९ को ठेक्कामा प्रमुख प्रशासकीय अधिकृत आचार्य र आरके कन्स्ट्रक्सनका सञ्चालक कार्कीबीचको मिलेमतोमा बैंक ग्यारेन्टी नलिई र नियमअनुसार बुझाउनुपर्ने मूल्य अभिवृद्धि कर (भ्याट) समेत दाखिला नगरी सम्झौता गरिएको अख्तियारको अनुसन्धानबाट खुलेको अख्तियारले जनाएको छ।
सम्झौता बमोजिमको रकम र राजस्व सरकारलाई नबुझाई गाउँपालिकालाई हानी नोक्सानी पुऱ्याएको पुष्टि भएपछि उनीहरूलाई प्रतिवादी बनाइएको छ।
अख्तियारले दुवै प्रतिवादीसँग जनही २२ लाख ४४ हजार ५०० रुपैयाँ बिगो दाबी गर्दै भ्रष्टाचार निवारण ऐन, २०५९ बमोजिम बिगो अनुसारको जरिवाना र कैद सजायको मागदाबी गरेको छ।
