नेपाली कांग्रेसका निवर्तमान कार्यवाहक सभापति पूर्णबहादुर खड्काले आज काठमाडौंको धुम्बाराहीमा भेला राखेका छन्।
उक्त भेलामा १४ औं महाधिवेशनबाट निर्वाचित पदाधिकारी, केन्द्रीय सदस्य, प्रदेश सभापति र जिल्ला सभापतिहरूलाई बोलाइएको थियो।
भेलामा निवर्तमान सभापति शेरबहादुर देउवा पक्षका अधिकांश नेताहरू सहभागी छन्।
नेता खड्काले राखेको भेलामा नेता शेखर कोइराला भने गएका छैनन्। विशेष महाधिवेशनसम्बन्धी मुद्दा सर्वोच्चमा विचाराधीन रहेका बेला खड्का र कोइराला सँगै देखिएका थिए। तर विशेष महाधिवेशनविरूद्ध परेको रिट सर्वोच्चले खारेज गरिदिएपछि खड्काले राखेको भेलामा शेखर गएका छैनन्।
आज धुम्बाराहीमा भएको भेलामा पूर्वउपसभापतिद्वय विमलेन्द्र निधि र विजयकुमार गच्छदार, पूर्वमहामन्त्रीहरू शशांक कोइराला, प्रकाशमान सिंह र कृष्णप्रसाद सिटौला, पूर्वसहमहामन्त्री महालक्ष्मी उपाध्याय डिना र उमकान्त चौधरी, नेता सुजाता कोइराला, प्रकाशशरण महतलगायत उपस्थित छन्।
तस्बिरहरू:
