सुर्खेतका दम्पतीको काठमाण्डाैंमा रहस्यमय मृत्यु, अनुसन्धान हुँदै

कर्णाली टुडे
कर्णालीटुडे २०७७, २६ पुष आईतवार १५:०९

सुर्खेत ।  सुर्खेत स्थायी घर भएका ३३ वर्षीय उमेश केसी र उनकी पत्नी ३३ वर्षीया सुदीक्षा गिरीको काठमाडौँमा शंकास्पद मृत्यु भएको छ ।

टोखाको ग्रान्डी भिल्ला नामक हाउजिङमा बस्दै आएका  दम्पती मृत अवस्थामा भेटिएको घटना रहस्यमय बनेको प्रहरीले जनाएको छ । उमेश केसी र उनको श्रीमती सुदीक्षा गिरी शुक्रबार घरभित्र मृत भेटिएका थिए ।

केसी आफ्नो बेडरुममा लडिरहेको अवस्थामा तथा सुदीक्षाको शव झुन्डिएको अवस्थामा भेटिएको थियो । उमेशको टाउकोबाट रगत बगेको र शवनजिकै रगत लागेको सिलौटोसमेत भेटिएको प्रहरीले जनाएको छ ।

सुदीक्षाको शव भर्‍याङको रेलिङमा सलले पासो लगाएको अवस्थामा भेटिएको थियाे । भाडाको घरमा दुईजना मात्र बस्दै आएका थिए।

आफन्तबाट खबर आएपछि शुक्रबार बेलुका करिब नौ बजे प्रहरी घटनास्थल पुगेको थियो । महानगरीय प्रहरी वृत्त महाराजगन्जको टोलीले घटनास्थलको मुचुल्का उठाएको छ ।

घरको मूल ढोका बन्द रहेको र पछाडिको ढोकाको लक तोडिएको अवस्थामा भेटिएको प्रहरीले जनाएको छ । सुदीक्षाकी दिदी सो ढोकाबाट घरभित्र प्रवेश गरेको आशंका गरिएको छ । घटनापछि उनी घरमा पुगेको बताइएको छ ।

अमेरिका बस्दै आएका उमेश दसैँमा नेपाल आएका थिए । ग्रिनकार्ड होल्डर उनी एक सातापछि अमेरिका फर्कने तयारीमा थिए । सगुनलगायत विभिन्न कम्पनीमा उनको लगानी रहेको पारिवारिक स्रोतले जनाएको छ ।

‘प्रारम्भिक रूपमा हेर्दा घटना श्रीमान्–श्रीमतीको झगडाको परिणाम हो कि जस्तो देखिन्छ,’ अनुसन्धानमा आबद्ध एक प्रहरी अधिकारीले भने, ‘तैपनि अहिले नै यही नै कारण हाे भन्न सक्ने अवस्था छैन ।’ दुवै मृतकको शव अस्पताल लगिएको र पोस्टमार्टमपछि मृत्युको कारण खुल्ने महानगरीय प्रहरी परिसर काठमाडौंका प्रवक्ता डिएसपी प्रमेश विष्ट बताउँछन् ।

घटना रहस्यमय भएको परिवारले बताएपछि शनिबार दिउँसो पनि प्रहरी टोली घटनास्थल पुगेर फेरि अवलोकन गरेको थियो । मृतकको अन्तिम समयमा को–कोसँग सम्पर्क भएको थियो बुझ्न प्रहरीले उनीहरूको मोबाइल परीक्षणका लागि विधिविज्ञान प्रयोगशालामा पठाएको छ । विभिन्न कोणबाट घटनाको अनुसन्धान भइरहेको प्रहरीले जनाएको छ । नयाँ पत्रिकाबाट 

Leave a Reply

Your email address will not be published. Required fields are marked *

Next Post

बहुमतको सरकार भए पनि बहुमतको महशुस भएन् : मुख्यमन्त्री शाही

२०७७, २६ पुष आईतवार १५:०९
सुर्खेत । प्रदेश सरकारसँग पूर्ण बहुमत भए पनि अल्पमत झैं सरकार चलाएजस्तो भएको कर्णाली प्रदेशका मुख्यमन्त्री महेन्द्र बहादुर शाहीले गुनासो गरेका छन् । पत्रकार संगकुरा गर्दै मुख्यमन्त्री शाहीले अल्पमतको सरकार चलाए जस्तो आफूलाई अनुभूति भएको बताएका हुन्। कर्णालीको विकासका लागि सबै एकताबद्ध हुनुपर्ने बेलामा आफ्नै पार्टीबाटै सहयोग नपाएको उनले दुख […]