पछिल्लाे २४ घण्टामा जुम्लामा धेरै वर्षा, बुधबारसम्म मौसम बदली हुने

कर्णाली टुडे
कर्णालीटुडे २०७७, २० पुष सोमबार १३:५१

सुर्खेत ।  सोमबार बिहानैदेखि देशभरको मौसममा बदली भएको छ। मौसम बदलीसँगै देशभर चिसो बढेको छ।

जल तथा मौसम विज्ञान विभागको मौसम पूर्वानुमान महाशाखाका अनुसार सोमबार बिहान काठमाडौं उपत्यकासहित देशका पहाडी भेगमा छिटफुट वर्षा र उच्च पहाडी भेगका साथै हिमाली क्षेत्रमा हिमपातसमेत भएको छ।

त्यस्तै, हाल हाल कर्णाली प्रदेशको पहाडी भागका स्थानहरू बाहेक अन्यत्र सबैतिर सामान्य बदली रहेको छ। पहाडी भू-भागमा हल्का वर्षा हुनुका साथै हिमाली भूभागमा हिमपात भएको छ। पूर्वी तराईका एकदुई स्थानमा हुस्सु र कुहिरो लागिरहेको छ।

पश्चिमी वायुको प्रभावले मौसम बदली

महाशाखाका मौसमविद् समीर श्रेष्ठले हाल पश्चिमी वायुको प्रभावका कारण देशभरको मौसम बदली भएको र केही ठाउँमा हल्का वर्षा तथा हिमपात भएको बताए ।

उनले भने, ‘बिहानैदेखि मौसम बदली भई देशभर चिसो बढेको छ। सोमबार राति पनि देशभर सामान्य बदली रही उच्च पहाडी तथा हिमाली भूभागमा हल्कादेखि मध्यम हिउँ पर्न सक्छ।’

कर्णाली र सुदूरपश्चिम प्रदेशका केही भूभागमा हल्का वर्षाको सम्भावना रहेको पनि महाशाखाले जनाएको छ।

देशका उच्च पहाडी र हिमाली भूभागका केही स्थानहरूमा हल्कादेखि मध्यम हिमपात र पहाडी भूभागका थोरै स्थानहरूमा हल्का वर्षा हुने सम्भावना रहेकोले पर्वतारोहण तथा यात्रा गर्दा सावधानी अपनाउन पनि मौसम पूर्वानुमान महाशाखाले अनुरोध गरेको छ।

जुम्लामा धेरै वर्षा

महाशाखाको विवरणअनुसार गत २४ घण्टामा जुम्लामा सबैभन्दा धेरै वर्षा भएको छ । जुम्लामा २३ दशमलव आठ मिलिमिटर वर्षा भएको छ भने जुम्लापछि विराटनगरमा धेरै वर्षा भएको छ । विराटनगरमा ११ दशमलव दुई मिलिमिटर, डडेल्धुरामा १० मिलिमिटर, धनगढीमा ९ दशमलव सात मिलिमिटर, दिपायलमा ६ दशमलव सात मिलिमिटर वर्षा भएको छ ।

चिसोबाट जोगिन आग्रह

महाशाखाले तराईका थोरै स्थानहरूमा बिहानीपख लागेको हुस्सु र कुहिरो दिउँसोसम्मै रहने र राम्रोसँग घाम नलाग्ने भएकोले चिसोबाट बच्न पनि अनुरोध गरेको छ।

हुस्सु कुहिरो र चिसोका कारण यात्रामा पर्न सक्ने जोखिम र अन्य प्रभावहरुबाट बच्न पनि महाशाखाले सतर्कता अपनाउन आग्रह गरेको छ। महाशाखाका अनुसार पश्चिम तराई कञ्चनपुर, कैलाली, बर्दिया, बाँके, दाङ, कपिलवस्तु, रूपन्देही, नवलपरासी पूर्व, नवलपरासी पश्चिम मध्य तराईमा चितवन, पर्सा, बारा, रौतहट, सर्लाही, महोत्तरी, धनुषा पूर्व तराईमासिराहा, सप्तरी, सुनसरी, मोरङ, झापा हुस्सु लाग्ने र चिसो बढ्ने हुँदाँ सतर्कता अपनाउन महाशाखाले आग्रह गरेको छ।

बुधबारसम्म मौसममा बदली हुने

महाशाखाका अनुसार आगामी बुधबारसम्म नै देशभरको मौसममा बदली हुने बताइएको छ। महाशाखाका अनुसार बुधबारसम्म सुदूरपश्चिम प्रदेश र कर्णाली प्रदेशमा सामान्य बदली तथा बाँकी प्रदेशहरुमा आंशिक बदली रहनेछ।

सुदूरपश्चिम प्रदेश र कर्णाली प्रदेशका थोरै स्थानहरुमा तथा गण्डकी र लुम्बिनी प्रदेशका स्थानहरूमा हल्का वर्षाको सम्भावना रहेको छ। साथै पश्चिमी उच्च पहाडी तथा हिमाली भागका केही स्थानहरूमा हल्का हिमपातको सम्भावना रहेको बताएको छ। थाहा खबरबाट 

Leave a Reply

Your email address will not be published. Required fields are marked *

Next Post

हिमपातपछि हुम्लामा हावाहुरी, चिसोले जनजीवन कष्टकर

२०७७, २० पुष सोमबार १३:५१
सुर्खेत । हिमपातपछि हुम्लामा चिसो बढेसँगै यहाँको जनजीवन कष्टकर बन्दै गएको छ । हुम्ला उच्च हिमाली जिल्ला भएकाले भारी हिमपातपछि सदरमुकाम सिमकोटसहित उत्तरी नाम्खा गाउँपालिका क्षेत्रमा चिसो बढेसँगै जनजीवन बष्टकर बन्दै गएको हो । आइतबार अपराह्नदेखि सिमकोटलगायत जिल्लाका उच्च क्षेत्रमा हिमपात भएको र बेँसीमा वर्षा भएसँगै चिसोले जनजीवन कष्टकर बनेको […]